Nasikop sa usa ka buy-bust operation ang usa ka 36-anyos nga negosyante og bulak human masakmitan og tulo ka kilo sa gituohang shabu nga mokantidad og ₱20.4 milyon, didto sa Barangay Cansojong, Talisay City niadtong hapon sa Hulyo 5, 2025.
Ang suspetsado nailhan sa alyas nga “Annie”, residente sa maong lugar, ug dugay na nga gibantayan sa mga otoridad tungod sa pagduda nga nalambigit kini sa ilegal nga negosyo.
Giduso ang operasyon sa Philippine Drug Enforcement Agency – Region 7 (PDEA-7) Regional Special Enforcement Team sa Mandaue City uban sa Cebu Provincial Office, Special Operations Unit, PNP Drug Enforcement Unit ug NAVAL Forces Central.
Sa operasyon, nakuhaan si Annie og 3 ka dagko nga putos sa gituohang shabu nga mitimbang og tulo ka kilo, buy-bust money, duha ka cellphone, mga ID, ATM cards, ug mga transaction notes nga magpakita sa kalapad sa iyang operasyon.
Sumala sa PDEA-7, kapin usa ka buwan silang nag-case build-up batok sa suspek. Nasuta pa nga kada semana kini kasagaran makapagawas og tulo ka kilo nga drogas sa mga dagkong siyudad.
Gikatakda siyang pasakaan og kaso ubos sa Section 5 ug 11, Article II sa Republic Act 9165 o Comprehensive Dangerous Drugs Act of 2022.
| via Renante Socia Lada