Gipasiugdahan karong Hulyo ang selebrasyon sa Nutrition Month 2025 nga nagdala sa temang “Sa PPAN: Sama-sama sa Nutrisyong Sapat Para sa Lahat!”
Nagpunting sa pagpangusog sa food security ug nutrisyon sa matag panimalay.
Matod ni Mae Angelie Nacor, RND, Project Development Officer, National Nutrition Council (NNC) Region 7, ang selebrasyon karong tuiga nagtumong sa pagpadasig sa mga pamaagi aron ang pagkaon nga himsog, luwas, ug makaya sa matag usa ug mahimong mas accessible sa tanang Pilipino, ilabi na sa mga kabus ug vulnerable nga sektor.
Gipasiugda usab sa NNC nga importante ang food security karon nga panahona tungod sa kalit-kalit nga pagsaka sa presyo sa mga palaliton, epekto sa kahimtang sa panahon, ug kakuwang sa access sa nutrisyonal nga pagkaon sa ubang lugar sa nasud.
Lakip sa mga aktibidad karong buwan mao ang feeding programs, gardening contests, community nutrition fairs, og mga seminars sa pagkaon ug nutrisyon, nga gimugna aron mapalapdan ang kahibalo ug partisipasyon sa katawhan.
Gihangyo sa NNC ang mga pamilya nga magsugod sa ilang kaugalingong backyard or container gardens, magtuon sa balanced diet, ug i-prioritize ang pagkaon nga sustansyado imbis instant o junk food.
Matod pa, ang kalampusan sa Nutrition Month dili lang sukdon sa kadaghan sa aktibidad, kundi sa epekto niini sa matag panimalay. Ang pagkaon nga himsog, kinahanglan mahimong tinuod nga makaya sa tanan.
Ang selebrasyon magpadayon hangtod sa katapusan sa Hulyo, uban sa paglaum nga ang mensahe sa nutrisyon ug food security magpadayon bisan human sa bulan sa kampanya.
I via Renante Socia Lada