Nakalas ang usa ka 28-anyos nga lalaki sa suba sa Sitio Magkabayo, Barangay Mandilikit, human kini giingong nakuryentehan samtang nanginhas gamit ang improvised electric fishing device, pasado alas 5:15 sa hapon niadtong Hulyo 8, 2025.
Ang biktima giila nga si James Sombilon, ulitawo ug residente sa maong lugar.
Sumala sa imbestigasyon sa kapulisan, wala na mipauli sa saktong oras ang biktima, maong gisundan siya sa iyang inahan nga si Maria Victiuse Meridio Sombilon. Didto sa suba, iyang nakit-an ang anak nga nahagba na ug may gunit pa sa electric machine nga gigamit sa pagpanginhas.
Sa pasiunang imbestigasyon, nasayran nga nakuryentehan ang biktima tungod sa ilang giingon nga delikado nga gamit—ang improvised electric machine, nga maoy hinungdan sa iyang hinanaling pagkamatay.
Gidala pa ang lawas ni Sombilon sa Isidro C. Kintanar Memorial Hospital alang sa postmortem examination, samtang padayon pa ang imbestigasyon sa kapulisan nga pinangulohan ni Police Major Janus O. Giangan sa Argao Police Station.
Gi-awhag sa kapulisan ang publiko nga likayan ang paggamit sa mga iligal ug delikadong pamaagi sa pagpangisda, aron malikayan ang susamang disgrasya.
I via Renante Socia Lada