Misaka na sa 22 ka tawo ang kumpirmadong namatay sa pagdahili sa basura sa Barangay Binaliw, Cebu City, samtang miubos na sa 14 ang gi-report nga missing, sumala sa pinakabag-ong datos nga gipagawas karong Enero 15, 2026 alas 6:30 sa buntag.
Sumala sa Cebu City Fire Office (CCFO) nga gihatag sa Command Post sa Binaliw, padayon ang search, rescue, ug retrieval operations sa lugar bisan pa sa lisod nga kahimtangan sa yuta ug daghang basura nga nagtabon sa apektadong lugar.
Sa kinatibuk-ang report, miabot na sa 54 ka tawo ang total nga naapektuhan sa maong trahedya. Gikan sa unang ihap nga 48, nadugangan kini og unom human masuta nga adunay dugang mga biktima nga nanginahanglan og medikal nga tabang.
Sa ihap sa mga nasamdan, misaka kini gikan sa 12 ngadto sa 18 ka tawo, nga kadaghanan anaa karon sa mga ospital alang sa obserbasyon ug pagtambal. Ang ilang kahimtangan padayon pang gimonitor sa mga medical teams.
Padayon ang panawagan sa lokal nga kagamhanan alang sa pag-amping sa mga residente, labi na sa mga nagpuyo duol sa landfill area, samtang nagpadayon ang operasyon ug assessment aron malikayan ang dugang nga peligro ug masiguro ang kaluwasan sa tanan.
I via Renante Socia Lada