Gipatin-aw sa Cebu Provincial Prosecutor’s Office nga dili mahimong basihanan sa kriminal nga kaso ang usa ka AI-generated nga litrato, human gibasura ang reklamo batok kang Gov. Pamela Baricuatro may kalabotan sa hulagway nga nagpakita kaniya nga nagsul-ob og giingong SWAT uniform.
Sumala sa duha ka pahid nga resolusyon, wala makit-i sa piskaliya ang igo nga ebidensya aron mapamatud-an nga adunay nahitabong krimen. Giingon nga wala naporma ang tanang elemento sa kaso, ilabi na kay napamatud-an nga computer-generated lamang ang litrato.
Gidugang pa sa mga piskal nga tungod kay dili tinuod ang hulagway, dili kini matawag nga publiko ug sayop nga paggamit sa uniporme o insignia. Dugang pa, wala usab klaro nga ang uniporme nga makita sa litrato sakop sa usa ka specialized unit sa kapulisan.
Ang desisyon gipagawas niadtong Disyembre 19, 2025, ug ang kupya gipagawas kagahapon Enero 14, 2026 nga gipirmahan nila Senior Assistant Provincial Prosecutor Marlon Atillo ug Provincial Prosecutor Ludivico Vistal Cutaran, na maoy nagpasiugda sa maampingong pagtan-aw sa ebidensya sa mga kasong may kalabotan sa AI ug digital content.
Ang kaso gisang-at ni Byron Garcia igsuon ni kanhi Gob. Gwen Garcia nga misumbong nga iligal matod pa ang pagsul-ob og uniporme sa litrato nga gipost sa opisyal nga Facebook page sa gobernador. Apan sumala sa piskaliya, ang presensya sa AI technology wala deretso nagpasabot og krimen, gawas kung adunay lig-on ug klarong ebidensya.
I via Renante Socia Lada