Nadakpan sa mga sakop sa Tagbilaran City Police Station ang usa ka 51-anyos nga lalaki nga giingong nalambigit sa iligal nga pagbaligya sa mga pusil nga posibleng magamit sa mga kriminal nga grupo. Ang operasyon nahitabo niadtong Oktubre 21, 2025, sa Dangoy Street, Purok 7, Barangay Bool, Tagbilaran City, Bohol.
Ang operasyon kabahin sa gipakusgan nga kampanya sa Police Regional Office 7 (PRO7) batok sa mga sindikato ug kalihokan nga nalambigit sa iligal nga pagpamaligya og armas.
Pinaagi sa impormasyon nga nadawat sa kapulisan, gilusad ang usa ka buy-bust operation nga nagresulta sa pagkasikop sa suspetsado human niini madawat ang marked money gikan sa pulis nga nagpatoo nga mopalit.
Nakuha nga ebidensya sa operasyon mao ang usa ka caliber .38 revolver nga adunay duha ka buhing bala, usa ka sling bag, cellphone, ug ang kwarta nga gigamit sa buy-bust. Ang tibuok operasyon gikuhaan sa body-worn cameras aron masiguro ang transparency ug pagsunod sa operational protocols.
Ang suspetsado, nga lumad sa Taytay, Loon, Bohol ug nagpuyo karon sa Barangay Mansasa, Tagbilaran City, gipaslak na sa kustodiya sa kapulisan ug pasakaan og kasong paglapas sa Republic Act 10591 o Comprehensive Firearms and Ammunition Regulation Act.
Sa iyang pamahayag, si PBGEN Redrico A. Maranan, Regional Director sa PRO7, mipasidungog sa Tagbilaran City Police sa ilang paspas ug intelihenteng aksyon.
“This successful operation demonstrates our unwavering commitment to preventing the spread of illegal firearms that threaten public safety. Our efforts reflect the professionalism and vigilance of our personnel on the ground,” segon ni PBGEN Maranan.
Source: PRO7 PIO
I via Renante Socia Lada