Nagpahibalo ang probinsiya sa Cebu nga posible pa nga modaghan ang mga dagkong tigum ug kumperensya sa Sugbo human sa malampusong pag-host sa ika-48 nga ASEAN Summit.
Matod ni Gob. Pamela Baricuatro, dako kaayong epekto sa ekonomiya ug turismo ang ASEAN Summit kay nakadani kini og interes gikan sa dagkong event organizers nga gusto magpaabot og MICE events sa Cebu.
Ang MICE nagpasabot og Meetings, Incentives, Conferences, ug Exhibitions, nga mga kalihokan diin dagkong grupo sa mga tawo magtapok para sa negosyo, seminar, ug networking nga makatabang sa pagpalambo sa ekonomiya.
Gipahibalo usab nga walay natala nga major incident sa panahon sa summit. Kapin 8,000 ka pulis ug uniformed personnel ang gipakatap aron masiguro ang kahapsay ug kaluwasan sa mga delegado, sumala ni Kim Molitas.
Giingon sa mga opisyal nga ang kalampusan sa ASEAN Summit mahimong modelo sa sunod pang dagkong kalihokan sa Cebu, ug nagpasabot nga andam na gyud ang probinsiya sa mas daghang internasyonal nga events sa umaabot.
Source: Cebu Province PIO
I via Renante Socia Lada
GIPAHIGAYON ANG PANAGTIGOM SA MGA MANANAGAT SA CEBU PROVINCIAL CAPITOL PARA SA PAGPAUSWAG SA PANGINABUHI UG PANGISDA NGA PROGRAMA
Nagdungan ang mga lider ug miyembro sa nagkalain-laing asosasyon sa mga mananagat sa usa ka panagtigom nga gihimo sa dome sa Cebu Provincial Capitol, sa nakalabay nga adlaw. Ang maong tigum gitumong aron hisgutan ang mga isyu ug programa nga makatabang sa sektor sa pangisda sa lalawigan sa Cebu.
Sa maong panagtigom, gihisgutan ang proseso sa accreditation sa tanang fisherfolk associations aron masiguro nga ang matag grupo legal ug makabenepisyo sa mga proyekto sa gobyerno.
Gi-istoryahan usab ang template o porma nga gamiton para sa pagpili sa mga benepisyaryo sa mga proyekto.
Gisgutan usab ang kahimtang sa fish production ug ang potensyal sa agribusiness, ilabi na sa mga proyekto nga may kalabutan sa fish cage. Tumong niini nga mapalambo pa ang kita sa mga mangangingisda ug mapalig-on ang suplay sa isda sa probinsya.
Ang mga opisyal namati usab sa mga reklamo ug suhestyon sa mga mananagat aron mas masabtan ang ilang tinuod nga kahimtang sa panginabuhian. Gihatagan og importansya ang ilang mga kasinatian aron makahatag og tukmang solusyon ang gobyerno.
Gipasalig sa mga nagdumala sa tigum nga padayon nilang suportahan ang mga programa nga makapauswag sa panginabuhi sa mga mananagat pinaagi sa malungtarong pamaagi sa pagpangisda ug aquaculture.
Source: Cebu Province PIO
I via Renante Socia Lada