Usa ka trahedya sa kadalanan ang nahitabo sa Brgy. Bakhawan, Daanbantayan, Cebu, pasado alas 2 sa kadlawon, Pebrero 23, 2025, diin tulo ka tawo ang namatay human mabanggaan ang ilang motorsiklo sa usa ka utility bus.
Ang mga biktima giila nga sila si Carl Jay Espinosa Deniega, ang drayber sa motor, ug ang iyang duha ka angkas nga sila Ruben Yurag Ursal Jr. (18 anyos) ug ang iyang maguwang nga si RollyBoy Ursal (23 anyos). Pulos silang residente sa Brgy. Bakhawan, Daanbantayan.
Base sa imbestigasyon, gikan ang grupo sa Sitio Mohon, Kawit, Medellin, Cebu, ug samtang nagpadulong sila, nadasmagan sila sa bus, hinungdan sa kakusog nga bangga nga nakaresulta sa ilang kamatayon.
Ang drayber sa bus nga si Aljon Butaslac, taga Clavera, Borbon, Cebu, kasamtangang gitanggong sa kapulisan samtang nagpadayon ang imbestigasyon sa insidente.
Sa pagkakaron ang kapulisan padayon nga nagkuha og dugang impormasyon aron mahibal-an ang hinungdan sa aksidente. (Renante Socia Lada)