Usa ka dako nga kalampusan ang nahimo sa kapulisan sa Police Regional Office (PRO7) diin nasakmit sa mga awtoridad ang gibana-bana nga P20.4 milyon nga gituhuang shabu atol sa usa ka buy-bust operation.
Didto kini sa Barangay Poblacion, Panglao sayo sa kabuntagon, Domingo, Pebrero 23, 2025.
Nasikop sa operasyon ang suspetsado nga si Clifford Autida, 34 anyos, nga lumulupyo sa Purok 2, Barangay Dampas, Tagbilaran City.
Nakuha gikan kang Autida ang mga binultong gituhuang shabu nga adunay timbang nga tulo ka kilo, usa ka .45 caliber nga pusil, ug mga bala.
Ang nipahigayon sa maong operasyon ang taga Provincial Intelligence Unit – Provincial Drug Enforcement Unit sa Bohol Police Provincial Office, kauban ang Philippine Drug Enforcement Agency (PDEA)-Bohol.
Sa pagkakaron giandam na ang kasong kalapasan sa Comprehensive Dangerous Drugs Act, Comelec gun ban, ug illegal possession of firearms and ammunition. (Renante Socia Lada)