Patay ang usa ka drayber sa motorsiklo human nasaghiran sa usa ka trailer truck sa taytayan sa South Road Properties (SRP) sa sayong kabuntagon sa Sabado, Pebrero 14, 2026.
Ang biktima giila nga si Rolly Bayon, 28 anyos, sumala sa iyang driver’s license nga nagpakita nga residente siya sa lungsod sa Tabuelan. Sa inisyal nga imbestigasyon, nagmaneho siya sa iyang motor sa maong dapit pasado alas 4:00 sa kadlawon sa dihang nahitabo ang insidente.
Ang drayber sa trailer truck giila nga si Reynaldo Broa, 52 anyos ug lumad nga taga-Mindanao. Sumala sa iyang pamahayag, nakamatikod siya nga adunay motorsiklo nga nagpadulong sa iyang direksyon ug giingong kusog ang dagan niini samtang nag-ekis-ekis pa sa taytayan. Sa makadiyot, nakadungog siya og kusog nga lagubo nga tingog sa iyang sakyanan.
Mihunong dayon si Broa ug sa dihang mitan-aw sa side mirror, nakita na lang niya ang motorsiklo ug ang drayber niini sa pikas lane nga naghigda sa karsada.
Human sa hitabo, gidala sa Traffic Enforcement Unit (TEU) ang drayber sa trailer truck alang sa hustong imbestigasyon. Posible siyang mag-atubang og kasong Reckless Imprudence Resulting to Homicide samtang padayon ang pagkuha sa dugang ebidensya aron mahibal-an ang tinuod nga hinungdan sa trahedya.
📸 Contributed
I via Renante Socia Lada