Dakong kalampusan ang naangkon sa Cebu City Police Office (CCPO) human madakpan ang 25 ka wanted persons sa usa ka adlaw nga operasyon nga gilusad sa tibuok Cebu City.
Ang maong operasyon gihimo niadtong Pebrero 13, 2026, usa ka adlaw sa wala pa ang Valentine’s Day, isip kabahin sa paningkamot sa kapulisan nga masiguro ang kalinaw ug kahapsay sa syudad atol sa selebrasyon. Ubos sa pagpangulo sa Officer-in-Charge nga si PCOL George V. Ylanan, nakaserbisyo ang CCPO og kapin 350 ka warrant of arrest, nga mitultol sa pagdakop sa 25 ka akusado.
Sa 25 ka nadakpan, upat (4) ang giila nga Most Wanted Persons, samtang 21 ang ubang wanted persons. Ang ilang mga kaso naglakip sa murder, paglapas sa Republic Act 9165 o Comprehensive Dangerous Drugs Act of 2002, ug uban pang krimen.
Matod ni PCOL Ylanan, nagpakita kini sa aktibong pamaagi sa kapulisan sa pagsiguro sa kaluwasan sa komunidad. Padayon pa usab nilang palig-onon ang ilang operasyon aron mapadayon ang kalinaw ug kahapsay dili lang sa syudad kondili sa tibuok Central Visayas.
Giawhag usab sa CCPO ang katawhan nga magpabiling alerto ug motabang sa kapulisan pinaagi sa pagreport dayon sa bisan unsang kadudahang kalihokan sa pinakaduol nga estasyon sa pulis.
Source: CCPO
I via Renante Socia Lada