Usa ka trahedya ang nahitabo pasado alas 3:05 sa hapon, Disyembre 4, 2024, sa M.C. Briones St., Ibabao-Estancia, duol sa Shell Gasoline Station. Ang insidente naglakip sa usa ka Sino dump truck ug usa ka Honda XRM nga motorsiklo.
Ang dump truck gimaneho ni Fermine Tigbaw Andalosa, 36-anyos, nga taga Sangi, Toledo City. Samtang ang motorsiklo gimaneho ni Daniboy Villarico Lobetania, 21-anyos, lumulupyo sa Purok 4, Basay, Negros Oriental.
Sumala sa imbestigasyon, ang dump truck nagdagan padulong sa Maguikay flyover, samtang ang motorsiklo nagbiyahe sa pikas direksyon ug niliko paingon sa Shell Gasoline Station. Tungod sa kalit nga left turn, nagkabangga ang duha.
Walay kadaot ang dump truck, apan ang motorsiklo napasok sa ilawom niini. Si Lobetania nakaangkon og grabeng mga samad ug gidala dayon sa Mandaue City District Hospital (MCDH). Apan, gideklarar siya nga dead on arrival (DOA) alas 3:25 sa hapon.
Ang drayber sa dump truck kasamtangang naa sa kustodiya sa Station 4 samtang nagpaabot sa mga kasong ipasaka batok kaniya.
📸 MCPO
I via Renante Socia Lada