Gipalawom pa sa kapulisan ang imbestigasyon sa pagkamatay ni Abel Lawas, 48, human masayaran nga adunay nakakita nga misulay og likay ang biktima pipila ka segundos usa kini napasok sa garbage truck sa Bypass Road, Mambaling, sayong buntag, Disyembre 12, 2025.
Sumala sa inisyal nga impormasyon nga nakuha sa otoridad gikan sa usa ka residente nga duol sa dalan, nakita kuno ang motor ni Lawas nga morag mikalit og lingi sa tuo, usa ka lihok nga gitun-an karon sa kapulisan kung nakalikay ba siya og laing sakyanan o nag-adjust sa dalan kay nag-apas sa oras.
Ang drayber sa garbage truck nga si Jay, 38, nagpabiling under inquiry samtang gi-verify sa otoridad ang iyang pamahayag nga “wa gyud siyay nakit-ang motor,” ilabina nga ang ilang truck kay usa sa dagkong unit nga daghan og blind spot.
Gisusi usab karon kung ang dalan nga giagian sa duha, nga nailhang lu-ag sa buntag ug dili daghan og suga, posibleng nakaapekto sa ilang kahayag ug visibility.
Ang Mambaling Police mitaho nga missing pa ang usa ka CCTV angle nga makahatag unta og klaro sa lihok ni Lawas ug sa truck sulod sa katapusan 5 ka segundo sa crash. Ang City Transportation Office gi-alerto na aron makuha kini sa pinakadali.
Samtang giatiman ang pamilya sa biktima, giandam na usab sa mga traffic investigator ang technical reconstruction sa insidente aron masuta kung unsay tinuod nga posisyon ug gikusgon sa duha ka sakyanan.
Padayon ang imbestigasyon ug gilauman nga masayran ang klaro nga dagan sa imbestigasyon sa aksidente nga mikutlo og kinabuhi.
I via Renante Socia Lada