Paspas nga mitubag ang Cebu Provincial Government sa kahimtang ni Tatay Pedrito Davin, 69 anyos, nga nakita sa social media ang iyang grabe nga kalisod sa pagpuyo sa Purok Kolo, Barangay Estaca, Compostela. Human masangyawan ang istorya sa Proud Bisaya Bai, misugo dayon si Gov. Pamela Baricuatro og medical team gikan sa Cebu Provincial Hospital–Danao aron personal nga i-check ang sitwasyon sa tigulang.
Dungan sa pag-adto sa medical team, personal usab nga mibisita si Dr. Nikki Catalan sa Piso Public Health Program ug misiguro nga tanang medical needs ni Tatay Pedrito — tambal, operasyon, ug treatment — sakop ug bayran sa ospital. Giingon ni Dr. Catalan nga ilang gibantayan dayon ang post ug giaksyonan kay parte kini sa tumong sa probinsya nga dili pasagdan ang mga labing huyang.
Sa ospital sa Danao, gi-monitor karon si Tatay Pedrito samtang naghulat sa resulta sa laboratory test ug availability sa kwarto. Sa social media post, giringaw ni Dr. Catalan ang pasalamat sa mga nitabang sa pag-transfer sa tigulang, lakip na ang mga silingan nga mitabang aron madali ang pagdala kaniya sa ospital.
Sa viral post nga unang mikaylap, makita nga si Tatay Pedrito nagpuÂyo mag-inusara sa gamay’ng payag nga yuta ang salog ug molapok kung muulan. Upat ka tuig na sukad nabali ang iyang likod human mahulog ug tungod sa kakuwang sa kwarta para sa ₱90,000 nga operasyon, wala siya natambali. Karon, nagkagrabe ang iyang kahimtang, hubag ang tiil ug lisod na kaayo siya makatindog.
Lakip sa tabang karon, mitabang usab ang silingan nga si Eliza Larosa, nga mauy tigtan-aw, tigmahal ug tighatag pagkaon niya. Giingon ni Dr. Catalan nga ilaha usab pangitaon ang pamilya ni Tatay Pedrito aron aduna siyay makapuy-an ug makatabang niya human sa tambal. Gisiguro sa Capitol nga suportado si Tatay Pedrito hangtod makapauli siya nga luwas ug malinawon.
Source: Cebu Province PIO
I via Renante Socia Lada