Usa ka trahedya ang nahitabo sa Barangay Cambang-ug, Toledo City, human malumos ang usa ka 3-anyos nga bata sa sapa sa Sitio Ilag niadtong alas 11:30 sa buntag, Sabado, Hunyo 7, 2025.
Ang biktima giila sa Toledo City Police Station nga mao si Ryle B. Laspoña, lumolupyo sa Sitio Buswang sa maong barangay.
Sa imbestigasyon, giingon sa inahan sa bata nga gibiyaan niya kini sulod sa ilang balay alas 8 sa buntag samtang siya nanglaba sa gawas. Apan sa dihang misulod siya pag-usab, iyang nabantayan nga wala na ang bata ug dali siyang nangita niini.
Pag-abot sa alas 11 sa buntag, iyang nadunggan ang balita pinaagi sa usa ka Facebook post nga adunay batang nalumos sa sapa nga mga 500 metros ang gilay-on gikan sa ilang balay. Dali siyang miadto sa lugar ug nakumpirma nga ang iyang anak ang biktima.
Gidali-dali nila og dala ang bata gamit ang barangay service vehicle padulong sa Toledo City General Hospital, apan pag-abot didto, gideklarar na kining dead-on-arrival sa mga doktor.
Nagpahimangno karon ang lokal nga awtoridad sa mga ginikanan nga likayan ang pagbiya sa gagmay nga mga bata nga walay magtan-aw, ilabi na sa mga lugar nga duol sa sapa o ubang peligroso nga palibot.
I via Renante Socia Lada