Luwas nga gikuha ug giturn-over sa Philippine Coast Guard (PCG) ang mga wala mubuto nga bomba nga nakita sa Barangay Pooc, Talisay City, Cebu. Gitugyan kini sa Cebu Provincial EOD K9 Unit aron husto ug luwas nga madispose.
Nakita ang usa sa mga bomba atol sa pagkalot sa yuta sa usa ka gibiyaang balay niadtong miaging adlaw. Ang residente nga nakakita niini mitaho dayon sa Coast Guard. Pag-inspeksyon sa mga eksperto, nasayran nga usa kini ka 60mm mortar nga wala pa mubuto.
Niadtong Hulyo 7, giturn-over usab sa PCG ang ubang mga eksplosibo nga ilang nakuha kaniadto. Apil niini ang 2 ka 60mm mortar, 13 ka M203 rifle grenades, ug 4 ka live booster cartridges aron luwas nga madispose sa EOD personnel.
Gipasidaan sa Coast Guard ang publiko nga dili gayod hikapon o balhinon ang mga gidudahang bomba o eksplosibo. Kon adunay makit-an nga ingon ani, ipahibalo dayon sa Coast Guard, PNP, AFP, o sa lokal nga gobyerno aron malikayan ang peligro ug aksidente.
I via Renante Socia Lada