Cebu City – Gidagsa sa mga nagpa rehistro sa lain laing lugar sa Sugbo ang katapusang adlaw sa extension registration sa Commission on Election (Comelec), Sabado, Oktubre 30, 2021.
Gipanglantawan na kining daan sa Comelec nga mas modagsa ang gidaghanon sa mga voter applicant sa maong extended registration sa katapusang duha ka adlaw.
Matod ni Cebu City North District officer, Atty. Chauncy Bohols, nga duna silay daily average nga 200 ngadto sa 300 ka mga applicants, pero miabot na kini ug 600.
Gani nag expect sila ug 800.
Sa Syudad sa Lapu-Lapu ubay ubay ang wala maka rehistro gumikan kay na-abtan sa cut-off.
Sa pagpakig hinabi sa DYKC News team, dihay magtiayon nga naabtan sa cut off sa Comelec.
Matod sa bana nga uban sa iyang asawa, alas 8 pa sila sa buntag milinya, apan naabtan gihapon sila sa cut-off pagka alas 3.
Usa ka Trina Mae Solis, residente sa Poblacion, Lapu-Lapu, mipasangil nga dunay insertion o mosal-ut sa mga linya sa Comelec o dunay pabor pabor nga nahitabo.
“Failure sa mga taga city hall ug taga Comelec,” matod ni Solis.
“Imagine past 12 noon pm naa sa taas nya gidawta ang papel 6 pm na,” dugang saysay ni Solis.
Samtang sa Syudad sa Mandaue, karong adlawa, dunay total voters turn-out nga 544 mas ni menos kay sa kagahapon, Oktubre 29, nga miabot ug 647.
Alas 10 pa lang sa buntag, taas na ang linya sa mga magpa rehistro nga gipahigayon sa JCentremall.
Kahinumduman nga gilugwayan sa Comelec National Office ang registration gikan sa Oktubre 11 hangtud sa 30, 2021, alang niadtong wala maka parehistro pagka Septembre 2020 hangtud sa Septembre 2021.
(Source & photos courtesy of Comelec (Cebu City, Mandaue and Lapu-Lapu))
