Zamboanga del Sur – Nagmalampuson ang gipahigayon nga Ceremonial Vaccination alang sa mga batan-on nga adunay comorbidities edad 12 anyos hangtud na 17 anyos adlawng Biyernes sa Zamboanga del Sur Medical Center.
Kini subay sa mando sa Department Of Health nga ipahigayon ang pagbakuna sa mga menor de edad ug ilusad ang simultaneous Vaccination for Minors sa tibuok Zamboanga Peninsula karong umaabot nga Nobyembre 3.
Pinakaunang nabakunahan ang lalaking anak ni Dr. Cagampang nga si Anatalio “Gibo” Cagampang III.
Matud ni Dr. Anatallio Cagampang Jr., ang Chief of Hospital sa ZDSMC nga walay nakitang babag ang kawani sa DOH og sa hospital aron dili madayun ang pagbakuna sa mga kabatan-onan nga adunay gihambin nga kondisyon, tungod kay alang kini sa ilang kaluwasan og malikay sa COVID-19.
Gibutyag ni Dr. Agnes Fernando ang DMO-5 sa DOH Zamboanga del Sur nga Pfizer vaccine ug Moderna ang gigahin aron ibakuna sa mga batan-on tungod mao kini ang gi-aprobahan sa Food And Drug Administration kon FDA diin nahilakip ang Pfizer og Moderna sa mga bakuna nga dunay emergency use authorization. Dugang pa ni Dr. Fernando nga importante kaayo ang pagbakuna sa mga batan-on ilabi na sa mga adunay sakit tungod kay prone sila sa maong virus, ingun man nga sige silag anaa sa gawas.
Gitino ni Dr. Cagampang Jr., nga sa Zamboanga del Sur adunay duha ka Hospital ang nasabutan kon asa pagahimuon ang Vaccination for Minors with Comorbidities nga mao ang sa Margos Regional Hospital og Zamboanga del Sur Medical Center.
Samtang giklaro ni Dr. Cagampang nga didto palang daan sa mga RHU sa unang Distrito og sa Pagadian City nga mag pre-register na og maghimo’g assessment dayun ilista ang mga nakompleto nga rekisitos dayun maghatag og master list aron masugdan na dayun ang pagbakuna niini. Dugang pa niya nga anaa sa 60 hangtud na 100 ka mga batan-on ang gibana-banang mabakunahan kada adlaw gikan Lunes hangtud na sa adlaw nga Biyernes.
(Source: ZDS Press Bureau, photos courtesy of Victory Zamboanga del Sur)