Cebu City – Pasirad-an ang tanang menteryo lokop nasud gikan sa Oktubre 29 hangtud sa Nobembre 2, 2021, tumong aron pag minimize sa risgo sa Covid-19 transmission atol sa “Undas o Kalag-Kalag,” (All Souls’ Day).
Kini ang gipahibaw ni Interior Secretary Eduardo Ano, Miyerkules, Oktubre 20, 2021.
Sa briefing ni President Rodrigo Duterte nga gi air Miyerkules sa buntag, gibutyag ni Ano nga ang pandemic task force sa goberno mipasar ug resolution nga nag issue ug guidelines labot sa pagsaulog karong tuiga sa Kalag-kalag taliwa sa Covid-19 pandemic.
Matod sa secretary nga ang publiko mahimong maka bisita sa mga menteryo, memorial parks ug columbaria sa dili pa ang Oktubre 29 o human sa Nobyembre 2.
Ang mga bisita kinahanglang limitado lang sa 10 ka tawo matag grupo, ug ang venue, tugtan lang kutob sa 30 porsiento sa kapasidad.
Hinoon, matod ni Ano nga mamahimo kining patas-an ngadto sa 50 porsiento kung motugot ang local government unit.
Kinahanglan sab nga striktong motuman ang mga bisita sa minimum public health standards pag pakgang sa Covid-19 transmission.
Dugang ni Ano nga gitahasan sa pagpatuman niini ang Philippine National Police, local government units, lakip na ang mga opisyales sa kabarangayan.
Matod sa secretary nga ang LGU mopasar sab ug mga ordinansa o executive order alang sa pagpatuman sa measures atol sa adlaw sa mga kalag.
Sa iyang bahin si Acting Cebu City Mayor Michael Rama buot mopadayon sa naunang plano labot sa pagsaulog sa kalag-kalag.
Gibarugan ni Rama nga ablihan ang mga menteryo sa syudad atol sa kalag-kalag; hinoon, kadto lang mga fully vaccinated ang pasudlon sa atol sa Nobyembre 1 ug 2.
Gisuportahan ni Emergency Operations Center Deputy Implementer Cebu City Councilor Joel Garganera ang baruganan ni Rama nga angayang mangita ug bag-ong mga pamaagi sa pagsulbad sa mga problema.
Sa Probinsya sa Sugbo, gipahibaw ni Governor Gwendolyn Garcia, Martes, Oktubre 19 nga naa ra sa local government units pag hukom kung unsa ang pamaagi pag observe sa Kalag-kalag sa ilang matag lokalidad.
“I will not issue an across-the-board memorandum as regards for protocols for the coming All Saints Day and All Souls Day,” mensahi ni Garcia atol sa iyang regular press conference niadtong Martes.
Alang kang Garcia nga ang pagpatuman ug parehang guidelines ngadto sa tanang 44 ka mga kalungsoran ug unom ka component cities dili haum tungod kay managlahi ang sitwasyon matag lokalidad.
“Because our LGUs (local government units) and their respective cemeteries are not similarly situated. I will leave it to the judgment and wisdom of our local chief executives (LCEs),” gipasabot ni Garcia.
Dugang niini nga ang mga mayor maoy mo suta ug unsay sakto nga measures o protocols nga ipatuman kalabot sa Kalag-kalag.
Ubay ubay na ang mga lungsod sa Lalawigan sa Sugbo, lakip na ang Consolacion ang mi-anunsyo na nga ilang sirad-an ang ilang mga menteryo atol sa kalag-kalag; Nobyembre 1 (All Saints Day) ug Nobyembre 2 (All Souls Day).
(Source: IATF thru Interior Sec. Ano | Acting Mayor Michael Rama’s Presscon, photo courtesy by Rhein Yap)