Mangisayangkat ti Ilocos Norte Tourism Office ti kompetisyon a pakaitampokan dagiti napipintas a buya ditoy probinsia.
Paset daytoy iti napinget a kalikagum ni Gob. Matthew J. Marcos Manotoc nga ad-adda pay a pannakaipadur-as ti turismo.
Segun kenni Mr. Xavier Ruiz, Officer In-Charge ti INTO, maawagan ti nasao a pasalip iti Ilocos Norte Virtual Tour Competition.
Mainaig iti daytoy, nagpanawagan kadagiti amin a “filmmakers” wenno agar-aramid ti pelikula a mangisagana kadagiti camera da ket agsagana nga ag-zoon IN kadagiti paboritoda a lugar ditoy probinsia.
Ginutigotna dagitoy a mangaramid ti naidumduma nga “online adventure” ken itampokda ti nabaknang a kultura a mabalin a mangipaay kadagiti mangbuya ti aramidenda a pelikula a kasla nagpasiar ditoy probinsia babaen iti inaramidda a “virtual tour video”.
Impalgakna a ti nasao a pasalip ket silulukat kadagiti amin a residente ti Ilocos Norte ken dagiti filmmakers manipud iti rehion uno, dos ken tres.
Nupay kasta, inlawlawag ni Ruiz a sakbay nga agaramid dagiti maseknan ti pelikula ket nasken nga agisubmitir nga umuna dagitoy kadagiti kadagiti kasapulan a dokumento para iti pannakaipadalanda ti naiget a pannakatingiting.
Imbatadna a ti maudi a panagisubmitir kadagiti “preliminary requirements” ket intono Oktubre beinte ken intono Oktubre beinte singko ket mairakurak babaen iti Competition Committee dagiti sangapulo a finalist.
Inbunannagna a dagiti sangapulo a finalist ket umawat iti tallopulo ribu a pisos a “seed production grant”.
Kuna ni Ruiz a ti maudi ai panagisubmitir ti kumpleto a short film ket intono Nobiembre 24.
Innayonna nga adda ti dua a kategoria ti nasao a kompetision, umua ti para laeng kadagiti residente ti probinsia ken ti maikadua ket para kadagiti residente ti rehion uno, dos ken tres.
Mangiyalat ti Best Ilocos Norte Virtual Tour ti tallopulo ribu a pisos, Second Best Ilocos Norte Virtual Tour ket duapulo ribu a pisos ken ti third best Ilocos Norte Virtual Tour ket sangapulo ket lima ribu a pisos.
(Source: Provincial Government of Ilocos Norte)