Nanawagan ang Provincial Veterinary Office (PVO) sa dugang pa nga mga livestock farmers sa lalawigan sa Cebu nga magparehistro ug mo-avail sa libre nga insurance alang sa ilang mga hayop, nga gisuportahan sa Cebu Provincial Government.
Sumala ni Dr. Mary Rose Vincoy sa iyang pakighinabi sa iStorya Cebu, ang libreng insurance para sa mga mag-uuma kabahin sa mga serbisyo sa probinsya kauban ang Philippine Crop Insurance Corporation (PCIC).
Tumong sa programa nga matabangan ang mga mag-uuma nga makabawi ug mapadayon ang ilang panginabuhian kung adunay mamatay o mawala nga mga hayop tungod sa mga kalamidad.
“Libre ra gyud ni, mag-avail mo ani. Ang provincial government na ang mobayad sa premium, ug good for one year ang insurance sa inyong mga hayop,” matod ni Dr. Vincoy.
Gipasabot usab niya nga ang mga cheke sa indemnity direkta nga gi-isyu sa ngalan sa mga mag-uuma aron masiguro nga ang tibuok kantidad moadto gyud sa ilang pagpanginabuhi.
“Ang premium nga gibayad sa Cebu Provincial Government mao nay mobalik sa inyoha. Kinahanglan lang mo mo-avail, ug ang forms naa ra sa municipal agriculture office ug city veterinary services,” dugang niya.
Samtang, nangandam na usab ang Provincial Veterinary Office batok sa posibleng epekto sa El Niño nga mahimong makaapekto sa livestock ug agrikultura sa probinsya.
Sumala ni Dr. Vincoy, sayo pa nga tuig gihimo na ang mga tigum ug koordinasyon sa mga municipal agriculturists ug livestock coordinators. Naka-preposition usab sila og mga bitamina, minerals, ug antibiotics para sa mga hayop aron malikayan ang mga sakit ilabi na sa ting-uga nga panahon.
I via Renante Socia Lada