Cebu Governor Pamela Baricuatro mipadayag og pasalamat ug pagdayeg sa tanang child development workers sa tibuok probinsya sa Cebu tungod sa ilang dakong papel sa pag-amuma ug paggiya sa mga bata.
Sa iyang pakigpulong atol sa pag-abli sa Child Development Workers Week Celebration nga gihimo sa Capitol Heritage Park niadtong Hunyo 19, giingon sa gobernador nga dako kaayog tabang kining mga workers sa paghulma sa kaugmaon sa mga kabatan-onan sa Cebu.
“As a governor and as a mother, I firmly believe that investing in our children means investing in the future of Cebu,” matod pa ni Baricuatro. Gipasaligan usab niya nga ang kaugmaon sa probinsya magsugod sa kamot sa child development workers nga pirmi mag-atiman, magtudlo, ug maggiya sa mga bata sa ilang pinakaimportante nga mga tuig.
Giila sa gobernador nga lisod ang trabaho sa child development workers ug usahay dili dayon makita ang resulta sa ilang paningkamot. Apan iyang gipasantop nga ang matag bata nga ilang matabangan ug matag leksyon nga ilang matudlo usa ka lakang padulong sa mas lig-on ug mas maayo nga kaugmaon sa Cebu.
Nagpasalamat si Gob. Baricuatro sa ilang dedikasyon ug gitawag sila nga unang mga magtutudlo sa mga bata ug kaabag sa mga ginikanan sa pag-uma sa sunod nga henerasyon.
Iyang gipasiugda usab ang suporta sa provincial government aron masiguro nga ang matag batang Cebuano makadawat og saktong pag-atiman, giya, ug oportunidad sa pag-uswag.
Ang maong kalihokan gi-organisar sa Cebu Provincial Government pinaagi sa Provincial Social Welfare and Development Office (PSWDO) ubos ni Marirose Lopez.
Tumong niini ang pagpasidungog sa mga early childhood educators nga adunay dakong papel sa pagpalambo sa hunahuna sa mga bata.
Ang tibuok-adlaw nga aktibidad adunay mental health ug wellness talk, sing and dance contest, ug Search for Reyna ng ECCD. Nagtapos ang kalihokan pinaagi sa pagsayaw sa viral song nga “Hawak Mo Ang Beat” nga gipangulohan ni Gov. Baricuatro.
I via Renante Socia Lada