Padayon ang pagpakita og interes sa mga langyaw nga partner aron motabang sa Sugbo sa pagsulbad sa nagkadako nga problema sa pagdumala sa basura.
Pinakabag-o niini, usa ka delegasyon gikan sa Yokohama City sa Japan ang mitanyag og mga napamatud-an, luwas ug kasaligan nga pamaagi sa waste management ngadto kang Pamela Baricuatro ug Nestor Archival.
Sa presentasyon nga gihimo sa Kapitolyo niadtong Pebrero 16, gipakita nga sa Yokohama, napakunhod ang basura nga madala sa landfill hangtod sa 43.2 porsyento tungod sa ilang epektibong sistema.
Si Toru Hashimoto, presidente sa Y-Bridge ug consultant sa gobyerno sa Yokohama, uban ni Hiroyuki Fujisaki sa JFE Engineering, mipasabut sa ilang komprehensibo ug sistematikong pamaagi sa pagdumala sa basura, lakip ang mas hugot nga waste segregation o pagbulag sa basura.
Mitambong usab si Evelyn Castro sa Department of Economy, Planning, and Development Region 7, nga miingon nga ang mga programa sa Cebu nahiuyon sa nasudnong plano sa kalamboan.
Matod ni Gob. Baricuatro, andam ang probinsya sa pakigtambayayong sa mga kompanya nga makahatag og epektibong solusyon, human sa hustong pagtuon ug pagsunod sa saktong proseso, lakip ang posibilidad sa public-private partnership.
Giila usab nga posible nga ipatuman ang proyekto sa Minglanilla sa habagatan ug sa Danao City sa amihanang bahin sa Sugbo.
Source: Cebu Province PIO
I via Renante Socia Lada