Gisurender sa usa ka residente ang nagkalain-laing gamit sa iligal nga paghimo og pusil sa Sitio Patag, Barangay Manlayag, Danao City, alas 12:20 sa udto, Agosto 29, 2025. Kini usa ka lakang aron mosuporta sa kampanya sa gobyerno batok sa iligal nga armas, sumala sa Police Regional Office 7 (PRO7).
Ang pagsurender gihimo uban sa tabang sa mga opisyal sa barangay ug tabang sa 701st Maneuver Company (FOB Danao) sa Regional Mobile Force Battalion 7, uban sa kooperasyon sa Danao City Police Station. Ang maong kalihokan resulta sa padayon nga pakig-uban ug pagbantay sa komunidad.
Lakip sa gisurender mao ang usa ka electric push drill, duha ka manual air compressors, pito ka bench vises, usa ka cross vise, 54 ka steel files, duha ka revolver patterns, tulo ka cylinder patterns, tulo ka hacksaws ug napulo ka hacksaw blades, ug tulo ka manual sanders.
Ang tanang kagamitan anaa na karon sa kustodiya sa 701st Maneuver Company alang sa dokumentasyon ug hustong disposisyon. Kini magamit isip ebidensya ug aron malikayan nga magamit pa kini sa ilegal nga aktibidad.
Matod ni PBGEN Redrico Maranan, Regional Director sa PRO7, kini nga kalihokan kabahin sa ilang programa nga “Bakal ng Pagbabago: From Guns to Gifts, Turning Metals into Meaning” nga nagtumong sa pagpasiugda sa kalinaw ug pagwagtang sa iligal nga armas.
Matod pa, matag gamit nga isurender, usa ka lakang padulong sa kalinaw. Ang tinuod nga kausaban magsugod kung ang komunidad mopili sa kaluwasan kaysa bayolenti.
Source: PRO7-PIO
I via Renante Socia Lada