Duha ka suspetsado nga apil sa listahan sa Most Wanted Persons sa Central Visayas ang nadakpan sa lahi-lahi nga operasyon sa kapulisan sa Cebu ug Bohol niadtong Agosto 29, 2025. Kini parte sa gipakusgang Simultaneous Anti-Criminality Law Enforcement Operations (SACLEO) sa Police Regional Office 7 (PRO-7).
Sa Tuburan, Cebu, nadakpan ang usa ka lalaki nga giila nga Top 4 Most Wanted sa tibuok rehiyon tungod sa kaso nga Qualified Rape (2 counts). Ang warrant of arrest niini gi-isyu ni Judge Judilyn Hugo Tapia-Menchavez sa Toledo City RTC Branch 8 niadtong Agosto 14, 2025. Ang silot nga gipaabot kaniya mao ang reclusion perpetua o tibuok kinabuhi nga pagkabilanggo ug walay piyansa.
Samtang sa Danao, Bohol, nasikop usab ang usa ka lalaki nga giila nga Top 5 Most Wanted sa probinsya tungod sa kaso nga Rape ubos sa Article 266-A sa Revised Penal Code. Ang warrant gi-isyu ni Judge Leo Moises Lison sa Family Court Branch 3, Tagbilaran City, niadtong Disyembre 29, 2023. Sama sa laing kaso, posibleng silotan usab kini ug tibuok nga pagkabilanggo ug walay piyansa.
Karon, ang duha ka nadakpan anaa na sa custodial facilities sa ilang municipal police stations ug andam ipresentar sa korte nga nagmando sa ilang pagdakop.
Matod pa ni PRO-7 Regional Director, PBGEN Redrico A. Maranan nga dili magduha-duha ang kapulisan sa pagdakop sa mga tawo nga nakalapas sa balaod, bisan unsa pa kadugay sila nagtago, tuyo nga ang mga biktima makadawat sa hustisya nga angay alang kanila.
Gipasabot usab sa PRO-7 nga ang kalampusan sa pagdakop sa mga Most Wanted Persons bunga kini sa paningkamot sa kapulisan ug tabang sa komunidad.
Gi-awhag nila ang publiko nga magpabilin nga alerto ug mag-report dayon sa awtoridad aron mas mapadali ang hustisya ug mapabilin ang kahapsay ug kalinaw sa Central Visayas.
Source: PRO7-PIO
I via Renante Socia Lada