Gipasidunggan kagahapong adlawa Marso 17, 2025 ni Cebu City Mayor Raymond Alvin Garcia ang 22 ka mga atleta nga Persons with Disabilities (PWD) sa Dakbayan sa Sugbo atol sa flag-raising ceremony sa City Hall.
Kini human sa ilang pagsalmot sa Philippine National Para Games 2024 niadtong Nobyembre 11-14 sa kaulohan, ug sa 2KCares.org Paralympics niadtong Pebrero 22, 2025 sa Sacred Heart School-Ateneo de Cebu sa Mandaue City.
Sa 2KCares.org Paralympics, kapin sa 300 ka PWD nga atleta gikan sa lain-laing dapit sa nasud ang misalmot sa unom ka sports events, lakip ang bocce ball, sitting volleyball, goalball, athletics (long jump ug running), wheelchair basketball, ug para-swimming.
Sa maong kompetisyon, nakakuha ug 10 ka gold medals ang Mandaue City PWD team sa track events ug goalball, samtang midaog ang team gikan sa Maramag, Bukidnon sa wheelchair basketball.
Lakip sa mga atleta nga gipasidunggan sa Cebu City mao ang mga kawani sa City Hall nga sila si Levi Jonathan Tano, Alaine Tracy Lapus, Antonio Abatol, ug Nelson Fuentes.
Ang pag-ila ni Mayor Garcia nagpakita sa suporta sa lokal nga kagamhanan sa mga PWD nga atleta, nga nagpakita sa ilang talento ug determinasyon sa lain-laing sports events. (Renante Socia Lada)
(Source: Cebu City PIO)