Tungod sa nadiskubreng mga liki sa mga building sa Buhisan Elementary School ug Buhisan Night High School, nga gituohang resulta sa paglihok sa yuta, posibleng ipatuman ang online o blended learning alang sa mga estudyante sa maong eskuylahan.
Si Mayor Raymond Alvin Garcia mipadayag sa iyang kahingawa bahin sa kaluwasan sa mga tinun-an ug andam siyang ipahunong ang face-to-face nga klase aron malikayan ang peligro. Karong Marso 18, 2025, nakatakda siyang makigtagbo sa Department of Education (DepEd) ug Cebu City Disaster Risk Reduction and Management Office (CCDRRMO) aron hisgotan ang angayng buhaton.
“Dili ta magpaabot nga adunay mahitabo. Mas maayo nga mag-andam daan og alternatibong pamaagi sa pagklase aron dili mabiyaan ang edukasyon sa mga bata,” matod ni Garcia atol sa iyang press conference karong Marso 17.
Tungod sa kahimtang sa Buhisan, nga kasagaran bukid ug delikado sa pagdahili sa yuta, lisod ang pagpangita og bag-ong lokasyon alang sa eskuylahan. Bisan pa niini, ang lokal nga kagamhanan nagbuhat na og mga lakang aron maseguro ang kaluwasan sa mga estudyante.
Kung mapatuman ang online o blended learning, gibanabana nga moabot sa 700 ka mga tinun-an ang maapektuhan. (Renante Socia Lada)
(Source: Cebu City PIO)