Usa ka minyo nga lalaki gidakop sa kapulisan human siya giingong misigpo sa kinatawo sa usa ka 8-anyos nga batang lalaki sa gawas sa comfort room sa One Pavillion Mall sa Banawa, Cebu City, niadtong Huwebes, Pebrero 12, 2026, pasado alas 4:00 sa hapon.
Ang suspetsado, nga nailhan sa alyas nga si “Yanex,” 48 anyos, residente sa Sitio Nangka, Barangay Labangon, Cebu City, gilambigit sa kaso human nidangop ang amahan sa biktima ug mi-report sa Guadalupe Police Station.
Sumala sa amahan, grabe ang trauma nga nadangatan sa iyang anak tungod sa panghitabo. Ang bata gisigpo sa suspetsado samtang nigawas gikan sa comfort room, hinungdan nga dali dayon nakontak ang kapulisan ug gisikop ang suspek.
Nangayo og pasaylo ang suspetsado, apan ang amahan desidido nga pasakaan siya og kaso batok sa Special Protection of Children Against Abuse, Exploitation and Discrimination Act o Republic Act 7610.
Ang kapulisan nagpadayon sa imbestigasyon ug nagsiguro nga protektado ang bata samtang gipasaka ang legal nga kaso batok sa suspetsado.
📸 Contributed
I via Renante Socia Lada