Mikabat sa 567 ka pamilya nga naapektuhan sa Bagyong Tino ang nakadawat og pinansyal nga tabang pinaagi sa Multipurpose Cash Grant niadtong Biyernes sa buntag, Pebrero 13, 2026, sa Barangay Bonbon Covered Court sa Cebu City.
Ang matag benepisyaryo nakadawat og ₱8,000 gikan sa Philippine Red Cross isip bahin sa padayon nilang humanitarian assistance aron matabangan ang mga pamilya sa pagbangon ug pagpahiuli sa ilang kinabuhi human sa bagyo.
Nagsugod ang distribusyon alas 9:30 sa buntag ug gihimo kini kauban ang suporta sa Cebu City Government ug City Social Welfare and Development (CSWD).
Naa usab ang mga opisyal sa Red Cross sama ni Mr. Alexander Matheou, IFRC Regional Director for Asia Pacific; Mr. Sanjeev Kafley, IFRC Head of Delegation sa Pilipinas; ug Dr. Gwendolyn Pang, Secretary General sa Philippine Red Cross, aron motan-aw ug motabang sa kalihukan.
Sa nasayran ang Multipurpose Cash Grant maghatag og kagawasan sa mga pamilya ug makapalit sila sa ilang nag unang panginahanglanon ug tambal.
Gipasalamatan sa mga opisyal sa siyudad ang Red Cross sa padayon nga suporta ug giila ang kamahinungdanon sa partnership sa paghatag og tabang sa mga komunidad nga naapektuhan sa kalamidad.
Source: Cebu City PIO
I via Renante Socia Lada