Nipasalig si Cebu City Mayor Mike Rama nga adunay relocation site para sa mga nanimuyo nga nasulod sa three-meter easement kilid sa mga kasapaan sa dakbayan sa Sugbo.
Matod ni Rama nga iya nang gi-awhag si City administrator Collin Rosell nga pangitaan og mga relocation sites ang mga apiktado nga mga pamilya daplin sa kasapaan.
Gitan-aw karon ang mga posibling kabalhinan didto sa South Road Properties (SRP), o sa kara-an nga Cebu City Quarantine Center didto sa North Reclamation Area.
Awhag usab sa mayor ngadto sa mga commercial establishments nga nasakop sa tulo ka metros kilid sa sapa nga pang gub-on ug dili na maghuwat nga maigo pa sa mga katalagman.
“Ayaw namo og huwat (nga naa pay trahedya mahitabo),”matod ni Rama atol sa programa nga Ingna’ng Mayor over RMN Sugboanon Channel.
“Dili na sila nagmagahi. Ang importante nga ma-assure lang sila. I can guarantee sa atong pang gobyerno sa atong administration is (we promote) integration, dili disintegration,” dugang ni Mayor Rama.
Samtang ang mga sakop sa Task Force Gubat sa Baha (TFGsB) pinaagi sa ilang pangulo nga si Mel Feliciano naghatag na og final notice para sa mga establishment nga nasulod sa three-meter easement.
“Naa man gu’y situation ang iyang mga poste kay naa man sa easement. But case-to-case man gud na. Kung naa man gud sa easement ang main post, lisud man gud na gub-on kay maguba na tanan,” segon ni Feliciano. (Renante Socia Lada)
(Source: Cebu City PIO)