Nangayo og kasayuran si Cebu City Mayor Raymond Alvin Garcia sa Department of the Interior and Local Government (DILG) kung epektibo pa ba ang memorandum nga gipagawas atol sa pandemya, nga nagpasayon sa proseso sa pag-aproba sa mga cell site towers.
Atol sa ilang miting ni DILG Secretary Jonvic Remulla kagahapong adlawa, Pebrero 5, 2025, gipahibawo ni Mayor Garcia nga ang zoning board sa siyudad nakadawat og mga reklamo gikan sa mga barangay mahitungod sa pagtukod sa mga cell towers nga wala makonsulta ang komunidad o way gihimong public hearing.
Gipasabot sa mayor nga ang maong polisiya giluwatan aron mapadali ang digital infrastructure sa panahon sa pandemya, apan ang iyang kalabutan sa post-pandemic nga kahimtang dili pa klaro.
Sa tubag, gipadayag ni Secretary Remulla nga ang memorandum nagpadayon pa gihapon aron matubag ang kakulang sa telecommunication infrastructure sa nasud.
Iyang gikompara ang Pilipinas sa Vietnam, diin adunay 35,000 ka cell towers alang sa 70 milyones nga populasyon, samtang ang Pilipinas adunay 14,000 lang nga tower bisan og labaw sa 100 milyones ang populasyon.
Matod ni Remulla, gikinahanglan ang maong polisiya aron mapaspasan ang kalambuan ug mapauswag ang konektibidad, tungod kay ang mga barangay ordinansa usa sa nagbabag sa pagpanglambu sa telecommunication companies.
Apan, iyang giila nga ang kawalay klarong konsultasyon ug transparency sa pagtukod sa mga tower nagpabilin nga dakong isyu sa mga komunidad.
Tungod niini, nangayo si Mayor Garcia sa DILG nga susihon pag-usab ang memorandum aron masiguro nga mabalanse ang panginahanglan sa kalambuan ug ang mga kabalaka sa katawhan.
Source: Cebu City PIO
I via Renante Socia Lada