Gi-awhag ni Cebu City Acting Mayor Raymond Alvin Garcia ang kooperasyon sa katawhan alang sa umaabot nga Sinulog Grand Parade karong Enero 19, 2025. Sa coordination meeting nga gihimo karong hapon (Enero 3, 2025) sa Social Hall sa Cebu City Legislative Building, iyang gipasabot ang kahinungdanon sa kalinaw ug kahusay atol sa maong kalihukan.
Ang maong panagtigom gitambongan sa mga kadagkuan gikan sa Cebu City Police Office, Armed Forces of the Philippines, Bureau of Fire Protection, uban pang mga government enforcement agencies, ug barangay officials sa Cebu City.
Matod ni Mayor Garcia, usa ka dako nga kausaban sa Sinulog 2025 mao ang pagbalik sa venue ngadto sa Cebu City Sports Center, human kini gihimo sa SRP niadtong 2024. Tungod niini, gilauman nga mosaka ang ihap sa contingents gikan sa 18 niadtong milabay nga tuig ngadto sa 45 karong tuiga.
Ang Sinulog Grand Parade nagdala og dakong responsibilidad alang sa tanang stakeholders, ug gihatagan og gibug-aton sa mayor nga ang kalampusan niini magdepende sa kooperasyon ug suporta sa katawhan. (Renante Socia Lada)
(Source: Cebu City PIO)