Nitambong si Cebu City Mayor Nestor Archival Sr. sa Participatory Governance Summit aron ipakita ang padayon nga suporta sa Cebu City Government sa usa ka gobyerno nga bukas, klaro, ug naghatag og dakong papel sa katawhan. Ang maong kalihokan gihimo sa Cebu Provincial Government kauban ang DILG Region 7 ug Ramon Aboitiz Foundation Inc. (RAFI).
Kapin sa 2,000 ka mga representante gikan sa civil society organizations (CSOs), people’s organizations (POs), non-government organizations (NGOs), business groups, ug mga lokal nga panggamhanan sa tibuok Sugbo ang mitambong sa summit. Si Mayor Archival usab usa sa mga reaksyonista sa panel discussion kauban sila Mandaue City Councilor Atty. Joel M. Seno ug Lapu-Lapu City Administrator Atty. Danilo E. Almendras.
Atol sa panaghisgot, gipasabot ni Mayor Archival ang mga programa sa siyudad alang sa pagpanalipod sa kalikupan sama sa “One Tumbler at a Time” nga nagdasig sa paggamit og reusable tumbler aron maminusan ang plastik nga basura. Gihisgutan usab niya ang Eco Station sa South Road Properties (SRP), diin ang mga basura husto nga gilain, gi-recycle, ug gihimong mapuslanong materyales pinaagi sa kooperasyon sa komunidad.
Gipasiugda sa summit ang kamahinungdanon sa lig-on nga panaghiusa tali sa gobyerno ug sa katawhan aron mapalambo ang maayong pangagamhanan, transparency, accountability, ug malungtarong kalamboan.
Sumala sa Cebu City Government, magpadayon kini sa pagpalig-on sa partisipasyon sa mga residente aron ang matag Sugboanon adunay tingog ug papel sa paghulma sa kaugmaon sa siyudad.
I via Renante Socia Lada