Nakadakop ang Cebu Police Provincial Office (CPPO) og 605 ka tawo nga nakalapas sa nagkalain-laing lokal nga ordinansa atol sa 242 ka operasyon nga gihimo sa tibuok lalawigan sa Cebu kagahapon Hulyo 13, 2026. Kabahin kini sa Safer Cities Initiative aron mapadayon ang kalinaw ug kahapsay sa mga komunidad.
Sa mga nasakpan, 462 ang nakalapas sa traffic nga ordinansa, 35 ang nag-inom og ilimnong makahubog sa pampublikong lugar, 15 ang nanigarilyo sa dili angay nga lugar, 13 ang naglakaw nga walay sanina sa taas nga bahin sa lawas, 37 ka menor de edad ang nakalapas sa curfew, 8 ang nagpatukar og videoke lapas sa gitugot nga oras, ug 35 ang nakalapas sa ubang lokal nga ordinansa.
Mikabat sa ₱196,340 ang nakolektang multa, samtang 143 ka nakalapas ang gipahimangnoan ug gipagawas sumala sa mga lagda sa ilang lokal nga pangghanan.
Matod ni Cebu PPO Provincial Director PCOL Abubakar Udang Mangelen Jr., ang kampanya dili lang alang sa pagdakop sa mga nakalapas, kondili aron mapalig-on usab ang disiplina ug pagtuman sa balaod sa komunidad. Iyang giingon nga pinaagi sa padayon nga operasyon ug presensya sa kapolisan, mas mapugngan ang krimen ug masiguro ang kaluwasan sa mga lumolupyo.
Gipasalamatan usab ni Governor Pamela S. Baricuatro ang CPPO ug ang mga lokal nga gobyerno sa ilang panagtinabangay aron mapadayon ang malinawon, organisado, ug luwas nga mga komunidad sa tibuok lalawigan sa Cebu. Nagpasalig ang CPPO nga ipadayon ang ilang mga operasyon aron mapreserbar ang kalinaw ug kahapsay alang sa tanang Sugbuanon.
I via Renante Socia Lada