Nakigkita si Cebu Governor Pamela Baricuatro sa tulo ka menor de edad uban sa ilang mga ginikanan niadtong Hulyo 13 aron hisgutan ang ilang nalambigitan nga mga insidente sa hulga sa eskwelahan ug kapintas. Nangayo og pasaylo ang mga menor sa kahadlok nga ilang nahatag sa publiko ug sa hasol nga ilang gipahinabo sa mga awtoridad.
Duha sa mga menor, nga 12 ug 13 anyos gikan sa Talisay City, miangkon nga sila ang naghimo sa mga hulga nga gi-post sa social media batok sa duha ka eskwelahan. Matud nila, nasundog ra nila ang ilang nakita online ug naglaom nga masuspenso ang klase.
Ang usa kanila miingon nga wala siya kaandam sa umaabot nga eksamin. Samtang ang 17 anyos gikan sa Carcar City miingon nga nagdala siya og sundang tungod kay gikapoy na siya sa padayon nga pagpang-bully kaniya sa ubang estudyante.
Gipahimangnoan ni Gov. Baricuatro ang mga menor nga seryoso ang gobyerno sa tanang hulga ug kapintas, apan gusto usab niyang masabtan ang hinungdan sa ilang gibuhat aron matabangan sila nga dili na kini mausab. Gidasig usab niya ang mga ginikanan nga mas bantayan ang ilang mga anak ug likayan ang pagtuo dayon sa tanang makita sa social media tungod sa daghang bakak ug makadaot nga sulod niini.
Human sa panagtigom, nakahukom ang gobyerno nga hatagan pa og laing higayon ang tulo ka menor. Ilang pauswagon pinaagi sa intervention program sa Department of Social Welfare and Development (DSWD). Sa wala pa sila mopahawa, giawhag sila ni Gov. Baricuatro nga magpokus sa ilang pagtuon, likayan ang kasamok, ug mahimong responsableng mga miyembro sa ilang komunidad.
I via Renante Socia