Nagpadayon sa pagpahugot sa mga lakang batok sa kakulang sa tubig ang Cebu City Government samtang nagkaduol ang El Niño nga gilauman makaapekto sa suplay sa tubig sa siyudad sa umaabot nga mga bulan.
Atol sa 3rd Cebu City Development Council (CCDC) Full Council Special Meeting kagahapon Marso 26, 2026 sa City Hall, gipasiugda ni Mayor Nestor Archival ang kaimportante sa sayong pagpangandam ilabi na sa mga barangay sa kabukiran nga kasagaran maapektuhan sa kakulang sa tubig.
Matod sa mayor, kung moabot na ang El Niño, posibleng mahubas ang mga tinubdan sa tubig sa bukid, nga mahimong hinungdan sa kakulang sa suplay sa pipila ka lugar sa siyudad.
Gipadayag usab niya nga sa pagkakaron, upat lamang ka water tanker trucks ang gigamit sa siyudad aron mohatag og tubig sa mga lugar nga nanginahanglan, ug posible kini dili igo kung mosamot ang epekto sa El Niño. Tungod niini, gikinahanglan ang dugang nga mga water tanker aron mas mapaspasan ug mapalapad ang distribusyon sa tubig.
Lakip sa mga lakang nga gisugyot ni Mayor Archival mao ang pagpaayo ug pag-revive sa mga karaang poso ug tabay sa matag barangay. Gi-awhag niya ang mga kapitan sa barangay nga maghimo og lista sa mga poso nga wala na magamit aron matagan kini og pondo ug maayo pag-usab.
Gipahibalo usab sa mayor nga nakigkoordinar na ang siyudad sa Metropolitan Cebu Water District (MCWD) aron magtukod og mga common water access points sa mga barangay nga kulang sa tubig. Kini nga mga lugar dumala-on sa mga barangay officials aron mas organisado ang pag-apod-apod sa tubig sa komunidad.
Ang maong tigum gitambongan sa mga kapitan sa barangay, mga representante gikan sa Department of the Interior and Local Government (DILG) Cebu City, mga miyembro sa konseho, civil society organizations, ug uban pang ahensya sa gobyerno.
Source: Cebu City PIO
I via Renante Socia Lada