Nagpatuman ang Cebu City Government og mas hugot nga mga lakang sa pagdahinot sa enerhiya sa tanang opisina sa gobyerno, sumala sa Memorandum No. 2026-00176-B nga gipirmahan ni Mayor Nestor D. Archival.
Tumong sa maong direktiba ang pagkunhod sa konsumo sa kuryente ug gasolina taliwala sa pagsaka sa presyo sa fuel, samtang gipauswag usab ang episyente ug malungtarong operasyon subay sa Energy Efficiency and Conservation Act.
Ubos sa bag-ong giya, gimandoan ang tanang opisina nga magdahinot sa enerhiya pinaagi sa pagpalong sa suga ug mga gamit kung dili na gamiton, paggamit sa natural nga kahayag, ug pagbalhin sa energy-efficient nga teknolohiya sama sa LED lights ug inverter appliances.
Ang paggamit sa aircon limitahan lamang gikan alas 9:00 sa buntag hangtod alas 4:00 sa hapon, ug ang temperatura dili dapat moubos sa 25°C. Sa oras sa paniudto, ipalihok ang fan mode aron makadaginot sa kuryente.
Giawhag usab ang mga empleyado nga mogamit sa hagdanan kung mahimo, samtang ang elevator iprioridad alang sa mga persons with disabilities, senior citizens, buntis, ug adunay medikal nga kondisyon.
Gimandoan usab ang mga opisina nga magpatuman og paperless transactions, gamiton ang energy-saving mode sa mga device, ug siguruhon nga mapalong ang tanang kagamitan human sa oras sa trabaho.
Lakip sa polisiya ang pagpalambo sa fuel efficiency pinaagi sa pag-share og sakyanan, husto nga pagplano sa biyahe, regular nga maintenance sa mga government vehicles, ug paglikay sa walay pulos nga pagpaandar sa makina.
Ang matag opisina kinahanglan magtudlo og Energy Efficiency Coordinator ug magsumite og binuwan nga report sa konsumo sa kuryente ug fuel aron masubay ang ilang pagsunod sa polisiya. Ang mga opisina nga makapakita og dako nga pagkunhod sa konsumo pasidunggan sa umaabot nga mga programa sa siyudad.
Gipasabot ni Mayor Archival nga importante ang kooperasyon sa tanang opisina aron mapalambo ang energy conservation, mapakunhod ang gasto, ug maprotektahan ang kinaiyahan sa Cebu City.
Source: Cebu City PIO
I via Renante Socia Lada