Nagpatuman og dugang lakang ang Cebu City Government batok sa African Swine Fever (ASF) human gipirmahan ni Mayor Nestor Archival ang supplemental executive order niadtong Agosto 3. Kini dugang sa Executive Order No. 86 nga nagdili sa pagpasulod ug paggawas sa buhing baboy, karne sa baboy ug uban pang produktong gikan sa baboy aron mapugngan ang pagsaka sa ASF.
Ubos sa maong mando, mas palig-onon sa Department of Veterinary Medicine and Fisheries (DVMF) ang inspeksyon sa mga pantalan, merkado, ihawan ug ubang lugar diin adunay pagbaligya ug pagbiyahe sa baboy.
Makigtambayayong usab kini sa kapulisan, Coast Guard, Department of Agriculture, mga barangay ug uban pang ahensya aron mapugngan ang pagsulod sa posibleng adunay ASF.
Gimandoan usab ang mga barangay nga motabang dayon sa quarantine, inspeksyon ug pagmonitor sa sakit. Ang mga mag-uuma, negosyante, tigbaligya ug tigbiyahe sa baboy kinahanglan usab nga mosumbong dayon kung adunay gidudahang kaso sa ASF, kalit nga pagkamatay sa baboy, o ilegal nga pagbiyahe sa mga produktong gikan sa baboy.
Gipahimangno sa syudad nga adunay aksyon batok sa mga molapas sa mando, sama sa pagtago sa kaso sa ASF, pagsukol sa inspeksyon, ug pagpalsipikar sa mga permit ug sertipikasyon. Ang maong supplemental order epektibo dayon ug magpadayon nga ipatuman kauban sa Executive Order No. 86.
I via Renante Socia Lada