Gidayeg sa Department of Social Welfare and Development (DSWD) Field Office VII ang Mandaue City tungod sa han-ay ug hapsay nga pagpatuman sa Social Pension (SocPen) Program. Gitan-aw usab sa DSWD-7 ang siyudad isip posibleng pilot area o sumbanan sa ubang lokal nga kagamhanan.
Kagahapon Agosto 4, 1,709 ka mga senior citizen gikan sa 27 ka barangay sa Mandaue City ang nakadawat og ₱3,000 matag usa isip ilang ikatulong quarter nga social pension. Gipahigayon ang payout sa Ibabao-Estancia Gym.
Mibisita ang mga opisyal sa DSWD-7 aron tan-awon ang proseso sa payout. Nakita nila nga paspas ug hapsay ang assessment, paghatag sa ayuda, ug pagreport, mao nga ilang gidayeg ang sistema sa Mandaue isip maayong ehemplo alang sa ubang mga LGU.
Sumala sa Mandaue City Government, padayon nilang giprayoridad ang kaayohan sa mga senior citizen ubos sa liderato ni Mayor Thadeo “Jonkie” Ouano. Milambo ang payout pinaagi sa panagtinabangay sa OSCA, City Treasurer’s Office, City Social Welfare Services Office, CDRRMO, Mandaue City Police Office, ug mga Barangay Public Safety Officers (BPSO).
I via Renante Socia Lada