Sa sayong buntag sa Martes, gisusi sa mga awtoridad ang usa ka giingong hulga nga gipakatap pinaagi sa Messenger batok sa usa ka pribadong eskwelahan sa Gov. M. Cuenco Avenue, Barangay Banilad, Cebu City. Human sa hingpit nga inspeksyon ug pag-verify, gikumpirmar nga walay tinuod nga hulga ug luwas ang lugar.
Sumala sa report, usa ka magtutudlo nakadawat og mensahe kagahapon Agosto 3 nga naglangkob sa maong hulga. Pagkahibalo sa eskwelahan sa mensahe, dali nga gipatuman ang safety protocols, lakip ang hapsay nga pag-evacuate sa mga estudyante, magtutudlo, ug kawani samtang gipahugtan ang seguridad.
Naghiusa ang kapulisan, mga opisyal sa eskwelahan, ug security personnel sa pag-inspeksyon sa tibuok campus. Human sa operasyon, ilang gipahibalo nga walay nakitang ebidensya sa bisan unsang aktuwal nga hulga. Padayon usab ang imbestigasyon aron mailhan ang nagpadala sa mensahe.
Gipahimangnoan sa mga awtoridad ang publiko nga seryoso ang paghimo og peke o bakak nga hulga pinaagi sa social media ug ubang online platforms. Kini mahimong hinungdan sa kahadlok, pagbalda sa klase, ug pag-usik sa oras ug kapanguhaan sa mga responder.
Giawhag usab ang tanan nga magmatngon, ireport dayon ang mga kahulga, ug responsableng mogamit sa digital platforms.
I via Renante Socia Lada