Gipasiugda ni Cebu City Mayor Nestor Archival sa iyang press conference kagahapon Abril 13 ang nagkalain-laing lakang sa gobyerno sa siyudad aron matubag ang mga isyu sa agrikultura, tubig, ug serbisyong publiko. Lakip sa gipunting ang paghatag og tabang sa mga mag-uuma nga naapektuhan sa kasamtangang kahimtang, sama sa posibleng cash assistance, libreng transportasyon sa ilang produkto padulong sa merkado sa siyudad, ug pagbalik sa mga programa sama sa “Tabo sa Barangay.”
Gibutyag usab nga nagpadayon ang koordinasyon sa gobyerno uban sa lain-laing sektor aron masulbad ang problema sa suplay sa tubig. Lakip sa mga lakang ang pagpangita og bag-ong tinubdan sa tubig sama sa tubod ug atabay, ug pagpalig-on sa sistema sa distribusyon padulong sa mga upland nga lugar. Sa dugayng plano, gusto sa siyudad nga mapalambo ang irrigation aron masuportahan ang panginabuhi sa mga mag-uuma.
Sa bahin sa food security, gipalambo ang urban gardening ug paggamit sa Black Soldier Fly technology aron magamit pag-usab ang organic waste. Giingon ni Archival nga ang basura dili dapat tan-awon nga walay pulos kondili usa ka resource, busa palapdan ang composting ug uban pang sustainable nga pamaagi sa pagdumala sa basura.
Gihisgutan usab ang kahimtang sa “Operation Second Chance” alang sa mga kabataan nga nakasupak sa balaod, diin kapin 100 ka menor de edad ang anaa karon sa pasilidad. Giplano ang pagpaayo sa ilang tulugan, seguridad, ug komunikasyon aron makakontak sa ilang pamilya, samtang dugangan usab ang social workers ug mentors. Samtang niini, padayon ang kampanya sa “Safer Cities” pinaagi sa hugot nga pagpatuman sa mga ordinansa batok sa pag-inom ug pagpanigarilyo sa publiko ug mga paglapas sa trapiko.
Dugang pa, gipahibalo sa mayor ang plano nga ₱35 milyon nga ayuda alang sa transport sector nga gihulat pa ang aprobasyon sa konseho, ug ang padayon nga pag-atubang sa problema sa basura ug landfill nga giimbestigahan karon sa Department of Environment and Natural Resources.
Gisuportahan usab niya ang posibleng pagtaas sa water rates aron masulbad ang krisis sa tubig, samtang gipadayon ang pilot implementation sa 24/7 government services aron mas mapalapdan ang serbisyo sa katawhan.
Source: Cebu City PIO
I via Renante Socia Lada