Nagpadayon karon ang pre-screening alang sa mga lumolopyo sa Segundo Distrito ug sa mga kasikbit nga lugar isip pagpangandam sa umaabot nga surgical, medical ug dental mission nga ipahigayon sa Mayo 1 hangtud 3, 2026.
Ang maong pre-screening ginabuhat sa Isidro C. Kintanar Memorial Hospital nga nahimutang sa Barangay Bogo, Argao, ug molungtad kini hangtud karong Sabado, Abril 18, 2026. Nagsugod ang aktibidad alas 8:00 sa buntag ug magpadayon hangtud sa hapon matag adlaw.
Ang kalihokan gi-organisar sa Cebu Provincial Government ubos sa liderato ni Gob. Pamela Baricuatro, kauban ang Vicente Sotto Memorial Medical Center (VSMMC), aron mahatagan og libreng serbisyo medikal ang mga residente nga nanginahanglan.
Gilauman nga pinaagi sa maong programa, mas daghang Sugboanon ang makabenepisyo sa libreng operasyon, konsultasyon medikal, ug dental services isip kabahin sa health care agenda sa probinsya.
Giawhag ang tanang interesadong molopyo nga moadto sa ospital aron makapa-pre-screen ug maapil sa libreng medical mission.
Source: Cebu Provincial Capitol PIO
I via Renante Socia Lada