Gipasiugda ni Cebu City Mayor Nestor Archival nga ang tanang ilegal nga drogas nga makumpiskar sa mga awtoridad kinahanglan gyud nga gub-on human makuhaan og mga sample alang sa proseso sa korte. Matud pa niya, kini aron masiguro nga dili na kini magamit pag-usab o makabalik sa merkado.
Ang pamahayag sa mayor nahiuyon sa pagsunog sa halos ₱700 milyon nga kantidad sa mga ginadiling drogas, kagahapon sa siyudad sa Sugbo nga gipangunahan sa Police Regional Office 7 (PRO-7) sa Cebu City. Ang maong kalihokan kabahin sa padayon nga kampanya sa gobyerno batok sa ilegal nga drogas.
Sumala ni Archival, importante ang husto ug transparent nga pagdumala sa mga ebidensya aron mapadayon ang pagsalig sa publiko ug mapalig-on ang kampanya batok sa kriminalidad. Ang hingpit nga pagbungkag sa mga drogas usa ka paagi aron malikayan ang posibilidad nga kini mahimong ma-recycle o maibalik sa sirkulasyon.
Nagpadayon usab ang Cebu City Government sa pagpakigtambayayong sa kapulisan ug ubang ahensya aron mapanalipdan ang mga Sugboanon ug mapadayon ang limpyo, luwas, ug responsable nga kampanya batok sa ilegal nga drogas.
I via Renante Socia Lada