Nagpagawas si Cebu Governor Pamela Baricuatro og Executive Order (EO) No. 42 aron mapalig-on ang pagpanalipod sa kaayohan sa mga pasyente ug masiguro ang patas nga paghatag og emerhensiyang serbisyo sa tanang 16 ka ospital nga gipanag-iya sa Gobyerno sa Probinsya sa Sugbo.
Ubos sa EO 42, obligado ang mga ospital nga modawat ug moatiman dayon sa tanang emerhensiya ug seryosong kaso bisan walay deposito o daang bayad, subay sa Anti-Hospital Deposit Law. Gipalig-on usab ang No Balance Billing policy alang sa mga kwalipikadong miyembro sa PhilHealth.
Gimando usab nga adunay 24 oras nga mga empleyado nga motabang sa PhilHealth processing, admission, ug medical social services aron dili maputol ang serbisyo bisan gabii, katapusan sa semana, ug mga holiday. Tabangan usab ang mga kabus ug walay PhilHealth aron makabenepisyo sa mga programa sa gobyerno.
Gimanduan ang mga chief of hospital sa pagpatuman sa maong mando ug pagmonitor sa pagsunod niini. Ang mga molapas sa EO 42 mahimong mag-atubang og administratibo ug legal nga silot, samtang mahimo usab nga modangop ang mga pasyente ug ilang pamilya sa Provincial Health Office aron ireport ang ilang mga reklamo.