Nagpadayon ang Cebu City Government sa pagpalig-on sa ilang kampanya batok sa pagbaha pinaagi sa Massive Bayanihan Declogging Operation nga gihimo niadtong Agosto 2. Nagtinabangay ang nagkadaiyang opisina sa siyudad, mga opisyal sa barangay, responders, volunteers ug mga residente aron limpyohan ang mga kanal ug agianan sa tubig.
Ang operasyon gipangulohan ubos sa direktiba ug personal nga pagdumala ni Mayor Nestor Archival. Miapil usab ang DEPW, DPS, CCENRO, CESET, Office of the Chief of Staff, mga barangay officials, ug mga miyembro sa komunidad aron mapaspasan ang pag-agas sa tubig ug mamenosan ang pagbaha sa mga apektadong lugar.
Bisan pa sa kalisod sa pipila ka lugar nga dili masudlan sa bug-at nga makinarya, wala gihunong ang operasyon. Manwal nga gitangtang sa mga trabahante ang lapok ug basura aron masiguro nga malimpyohan gihapon ang mga sapa ug drainage.
Matod ni Mayor Archival, importante ang panaghiusa sa gobyerno, mga barangay ug mga residente aron masulbad ang problema sa pagbaha. Ang maong operasyon kabahin sa padayon nga paningkamot sa Cebu City aron mahimong mas luwas, malungtaron ug mas maayong puy-an alang sa tanang Sugboanon.
I via Rebante Socia Lada