Gilunsad sa Cebu City Government ang Oplan BanTal: Discipline Zone aron mapalig-on ang disiplina sa mga dalan, mapahapsay ang dagan sa trapiko, ug mapalambo ang kaluwasan sa Gov. Cuenco Avenue.
Sugod niadtong Agosto 1 hangtod 5, gipahigayon una ang lima ka adlaw nga information ug education campaign aron masabtan sa mga drayber, pasahero, ug mga pedestrian ang bag-ong lagda sa trapiko sa dili pa kini ipatuman sa hingpit.
Sumala ni Mayor Nestor Archival, kabahin kini sa paningkamot sa dakbayan nga mahimong mas luwas ug organisado ang mga dalan. Lakip sa mga bag-ong lagda ang paggamit sa pinakatuong lane alang sa mga motorsiklo, pagpasakay ug pagpanaog sa mga pasahero sa PUV sa gitakdang loading ug unloading areas lamang, ug pagtabok sa mga pedestrian sa pedestrian lane o overpass aron malikayan ang aksidente.
Ang programa gipatuman sa Cebu City Traffic Office (CCTO), nga nagdeploy og mga personnel aron motudlo ug motabang sa mga motorista. Giawhag usab sa Cebu City Government ang tanang road users nga motuman sa mga lagda aron mahimong mas luwas ug hapsay ang dagan sa trapiko sa Gov. Cuenco Avenue, ilabina sa mga barangay sa Apas, Banilad, Kasambagan, ug Talamban.
I via Renante Socia Lada