Maayong balita para sa mga Mandauehanon! Mahatagan og prayoridad ang mga aplikante nga taga-Mandaue City sa 2,645 ka TESDA scholarship slots pinaagi sa programa sa Technical Education and Skills Development Authority (TESDA) sa pakig-uban sa University of Cebu (UC) ug Mandaue City Youth Development Office (MCYDO).
Kini nasabutan atol sa courtesy visit sa mga opisyal sa University of Cebu kang Mayor Thadeo “Jonkie” Ouano niadtong Biyernes, Disyembre 12. Tumong sa programa nga mahatagan og mas daghang higayon ang mga Mandauehanon sa libre nga tulo ka tuig nga diploma course sa Tourism and Hospitality Management.
Sumala ni Cerwin T. Eviota, Director of Marketing sa AWG Group of Companies nga nagdumala sa UC, abli ang scholarship para sa senior high school graduates, high school graduates sa old curriculum, ALS graduates (Batch 2017 ug ubos), ALS Senior High School passers, ug college undergraduates o transferees.
Matod usab ni Dr. Dennis A. Samar, UC Director for Technical Education, ang matag iskolar makadawat og libre nga tuition sulod sa tulo ka tuig, libre nga mga libro ug learning materials, libre nga TESDA National Assessment gikan NC II hangtod NC IV, ug ₱14,000 nga allowance matag semester aron motabang sa ilang gastohan sa eskwela.
Gidasig ang mga interesadong aplikante nga moadto sa UC-Maritime Education and Training Center (METC) Study Hall sa Barangay Mambaling, Cebu City, ug magpasa sa gikinahanglan nga dokumento sama sa PSA birth certificate, duha ka 1×1 ID picture (puti ang background), Form 137 o high school report card, certificate of Good Moral Character, honorable dismissal alang sa college undergraduates ug transferees, ug filled-up registration form nga ihatag panahon sa enrollment.
Gi-extend sa University of Cebu ang enrollment hangtod Disyembre 29, 2025 aron mahatagan og dugang oras ang mga interesadong aplikante sa pagkuha sa ilang TESDA scholarship slots.
Source: Mandaue City PIO
I via Renante Socia Lada