Gisugyot sa Cebu City Solid Waste Management Board (CCSWMB) nga sugdan na sa Cebu City ang hinay-hinay nga pagpapatuman sa waste segregation sugod sa 2026. Kini nga rekomendasyon ilang gipasa kang Mayor Nestor Archival atol sa ikaduhang miting sa board niadtong Disyembre 12, 2025.
Gidawat ni Mayor Archival ang maong sugyot apan iyang gipasiugda nga dili pa kini ipatuman dayon hangtod dili pa mahuman ang komprehensibong information campaign para sa katawhan. Matud niya, importante nga masabtan sa tanang residente ang mga kausaban pinaagi sa media, barangay activities, ug community education.
Sumala sa report sa board, aduna karon mga 20 ka pribadong dump truck nga gi-kontrata sa siyudad nga nangulekta og basura sa dagkong dalan. Miingon ang mayor nga kung masugdan na ang waste segregation, posibleng adunay mga adlaw nga dili kolektahon ang non-biodegradable nga basura, sama sa Lunes, Martes, ug Miyerkules. Magbutang usab og mga inspector aron masiguro nga tumanon ang balaod.
Matud pa sa mayor, klaro ug sayon sabton nga ipahibalo sa publiko ang tanang patakaran sa dili pa kini ipatuman.
Gihangyo usab ni Mayor Archival ang CCSWMB nga maghimo og resolusyon aron suportahan ang waste segregation isip opisyal nga palisiya sa siyudad.
Kung madawat ang sugyot sa sunod tuig, mag-assign og Barangay Enforcement Officers (BEOs) sa mga lugar nga kanunay gilabayan og basura. Gitugonan usab ang board nga maghimo og klarong giya unsaon pagbulag sa biodegradable ug non-biodegradable nga basura.
Aron ma-andam ang publiko, mag-apod-apod ang City Government og flyers, magpahigayon og mga interview sa radyo, moadto sa mga eskwelahan, ug magpatawag og general assembly sa mga magtutudlo aron mapakaylap ang hustong waste segregation.
Matud pa ni Mayor Archival, kung magmalampuson kini sa Cebu City, mahimo kini sundon sa ubang lugar isip kabahin sa pakigbatok sa problema sa basura.
Source: Cebu City PIO
I via Renante Socia Lada