Mas gipakusgan pa sa Mandaue City Government ang ilang Green Building Program aron mas mapanalipdan ang kalikupan ug masiguro nga ang mga bag-ong edipisyo sa siyudad mas “environment-friendly”.
Niadtong Biyernes, Disyembre 12, nagtigom ang mga miyembro sa Green Building Board aron hisgutan ang pagpaayo sa proseso ug serbisyo sa paghatag og BERDE- certified sa mga building nga may kalabotan sa negosyo ug patigayon.
Ang BERDE o Building for Ecologically Responsive Design Excellence usa ka boluntaryo nga national green building rating system nga gihimo sa Philippine Green Building Council. Tumong niini ang pagdasig sa pagtukod og mga imprastraktura nga lig-on, tipid sa enerhiya, ug mahigalaon sa kalikupan.
Sa miting, gituki nga sa pagtukod og mga building, kinahanglan sundon ang mga polisiya nga nagpanalipod sa palibot ug iapil ang Green Building Principles sa disenyo, sama sa husto nga paggamit sa enerhiya, tubig, ug natural nga kahayag.
Gipasiugda usab sa lokal nga kagamhanan sa Mandaue ang hugot nga pagpatuman sa Green Building Ordinance sa siyudad, ilabi na sa mga commercial buildings, aron mas maprotektahan ang kalikupan ug masustenir ang kalamboan sa dakbayan.
Nitambong sa miting sila Executive Secretary Atty. Riczen Gingoyon, Arch. Araceli Barlam sa Mandaue City Environment and Natural Resources, City Engineering Officer Engr. Reiner Englis, Arch. Marlo Ocleasa sa City Planning and Development Office, Engr. Crystal Comon sa Office of the Building Official, ug ubang kawani gikan sa nagkalain-laing departamento sa siyudad.
Source: Mandaue City PIO
I via Renante Socia Lada