Kaniadtong Disyembre 30, 2024, sa alas-7 sa buntag, usa ka 20-anyos nga promodiser ang nadakpan human masakpi nga nag-video gamit ang iyang cellphone sa usa ka 24-anyos nga babaye nga naligo sa banyo sa usa ka boarding house sa Sitio Pundok Gamay, Barangay Basak San Nicolas, Dakbayan sa Sugbo.
Sumala sa imbestigasyon sa kapulisan, samtang naligo ang babaye, nakabantay siya og cellphone nga gibutang duol sa ibabaw sa pultahan. Dali siyang nagtabon sa iyang kaugalingon, nigawas sa banyo, ug giatubang ang iyang ka-boardmate human mailhi ang tag-iya sa cellphone.
Ang suspek mitug-an nga iyang gibutang ang cellphone sa banyo. Gipahibalo sa babaye ang iyang bana bahin sa nahitabo, nga nisikop sa suspek ug gidala kini sa Mambaling Police Station alang sa detensyon.
Ang suspetsado mag-atubang og kaso ubos sa Republic Act No. 9995 o ang Anti-Photo and Video Voyeurism Act of 2009. Ang silot alang sa maong kalapasan naglakip og priso nga dili moubos sa tulo ka tuig o multa nga dili moubos sa P100,000, o parehas. (Renante Socia Lada)